Մայիսի 28-ին, խոշոր ավտովթար է տեղի ունեցել Երևանում։
Ինչպես դեպքի վայրից հայտնում է ֆոտոլրագրող Գագիկ Շամշյանը, Կոմիտաս 61 հասցեի մոտ՝ «Յունիբանկի» դիմաց, իրար են բախվել «Յամահա» մակնիշի 1349 APA համարանիշի մոտոցիկլետն ու «Նիսան Մաքսիմա» մակնիշի 15 TT 007 համարանիշի ավտոմեքենան։ Բախման հետևանքով մոտոցիկլետը շրջվել է, իսկ մոտոցիկլետի վարորդն ու ուղևորուհին մարմնական վնասվածքներ են ստացել։
Մոտոցիկլետի ուղևորուհին և «Նիսան Մաքսիմայի» վարորդն ու ուղևորը տեղափոխվել են Երևանի տարբեր հիվանդանոցներ, իսկ մոտոցիկլետավորը տեղում մահացել է։
Վթարի արդյունքում մոտոցիկլետիստի գլխից վայր է ընկել նրա սաղավարտը։
«Նիսան Մաքսիման» վարել է 42-ամյա Արմենակ Ավագյանը։ Դեպքի վայր են ժամանել Ճանապարհային ոստիկանության 1-ին սպայական գումարտակի մեծ թվով աշխատակիցներ, Ոստիկանության փորձաքրեագիտական կենտրոնի փորձագետները։
Վթարի վայրում քննչական աշխատանքներ ղեկավարում է Ոստիկանությանն քննչական գլխավոր վարչության Երևանի ճանապարհատրանսպորտային հանցագործությունների քննության բաժնի քննիչ Խաչիկ Սամվելյանը։
Լուսանկարները՝ Գագիկ Շամշյանի