Главная » 2012 » Июнь » 3 » Խոշոր ավտովթար Արարատի մարզում. շրջվել է Վեդի–Երևան երթուղային ավտոբուսը. 1 զոհ, 2 վիրավոր (ֆոտո, տեսանյութ)
09:45
Խոշոր ավտովթար Արարատի մարզում. շրջվել է Վեդի–Երևան երթուղային ավտոբուսը. 1 զոհ, 2 վիրավոր (ֆոտո, տեսանյութ)
հունիսի 2-ին խոշոր ավտովթար է տեղի ունեցել Արարատի մարզում։ Ինչպեսդեպքի վայրից հայտնում է ֆոտոլրագրող Գագիկ Շամշյանը, ժամը 17.35-ի սահմաններում Երևան–Արտաշատ ավտոճանապարհի 10–րդ կմ–ին՝ Մասիս քաղաք տանող ճանապարհի սկզբնամասում գտնվող գազալցակայանի մոտ, ճանապարհի երթևեկելի գոտուց դուրս է եկել և շրջվել է «ՖԱՈՒ» մակնիշի 3382 Լ համարանիշի Վեդի–Երևան երթուղային ավտոբուսը։
Նախնական տվյալներով ուղևորներից մեկը մահացել է, իսկ վարորդը՝ Լիպարիտ Կարապետյանը և ավտոբուսի մեկ այլ ուղևոր մարմնական վնասվածքներով տեղափոխվել են «Էրեբունի» բժշկական կենտրոն։
Դեպքի վայրում հավաքվածները Գ. Շամշյանին պատմել են, որ մահացածը 70-ն անց մի կին է։ Վիրավորը ևս կին է։
Մահացածին և վիրավորներին ավտոմեքենայից դուրս են բերել ՀՀ ԱԻՆ Փրկարար ծառայության Մասիսի հրշեջ–փրկարարական ջոկատի և Ճանապարհային ոստիկանության 2-րդ սպայական գումարտակի 1-ին վաշտի աշխատակիցներն ու քաղաքացիները։
Դեպքի վայր են ժամանել նաև ՀՀ Արտակարգ իրավիճակների նախարարության Արարատի մարզի փրկարար վարչության աշխատակիցները։
Գ. Շամշյանը հայտնում է նաև, որ շրջվելու հետևանքով ավտոմեքենայում եղած ողջ դիզվառելիքը թափվել էր։ Այն չեզոքացնելու նպատակով հրշեջներն օգտագործել են մեծ քանակի ջուր։ Նշված հատվածում երթևեկությունը ժամանակավորապես դադարեցվել է, որպեսզի հրշեջ–փրկարարները և ճանապարհային ոստիկանները կարողանան աշխատել։
